Мамлакатимизда тадбиркор аёлларни ҳар томонлама қўллаб-қувватлаш, касаначилик ва ҳунармандчиликни янада ривожлантириш, ишсиз хотин-қизларни тадбиркор аёлларга бириктириб, устоз-шогирд анъанасига мувофиқ тадбиркорликка йўналтириш, уларга жамиятда ўз ўринларини топишлари учун ҳар томонлама кўмаклашиш давлат сиёсати даражасида эътибор қаратилиб келинмоқда.
Бугун Янгиқўрғон туманида туман ҳокимлиги ҳамда Наманган вилояти Оила ва хотин-қизлар бошқармаси билан ҳамкорликда ташкилланган тадбиркор аёлларнинг кўргазмали фестивалида тумандаги 71 та маҳаллалардаги хотин-қизлар фаоллари, ҳудудларда тадбиркорлик фаолияти билан шуғулланиб, даромад топаётган ҳамда устоз-шогирд анъанасини давом этаётган хотин-қизлар иштирок этдилар.
Фестиваль давомида кўкёрлик парда, кўрпа, либос тикувчи Ф.Иннатуллаева, новлик ҳунарманд Ш.Абдусаматова, спорт кийимларини тикувчи тиллатепалик Т.Онорбоева, қизилёзилик миллий кўрпа, қуроқ ёстиқ тикувчи Ж.Каримоваларнинг қўл меҳнати билан яратилган буюмларга юксак баҳо берилди.
Ҳар бир тадбиркор ва ихтирочи аёллар билан уларнинг фаолияти доирасидаги имкониятлари ва фикрлари билан ўртоқлашган вилоят ҳокимининг ўринбосари Динора Якубова аёлларга ҳунарларини янада ривожлантириб, маҳсулотларини экспортга чиқариш, бунинг учун тинмай изланиш борасида ўз тавсияларини берди.
Фестивалда Динора Якубова ҳамда туман ҳокими Асадулло Нажмидинов томонидан бир қатор фаол аёлларнинг меҳнатлари эътироф этилиб, фахрий ёрлиқ ва эсдалик совғалари топширилди.
Шўх куй-қўшиқлар фестиваль иштирокчиларига кўтаринкилик бахш этди.