Маълумки, мамлакатимизда Ички ишлар, Камбағалликни қисқартириш ва бандлик ҳамда Ёшлар сиёсати ва спорт вазирликларининг "Обод ва хавфсиз" маҳалла тамойили асосида маҳаллаларда хавфсиз муҳитни яратиш бўйича Қўшма Қарор қабул қилинган эди.
Бугун Янгиқўрғон тумани Маданият марказида ана шу Қарор ижроси, жумладан туманда ҳуқуқбузарликлар профилактикаси ва жиноятчиликка қарши кураш бўйича амалга оширилган ишлар ва бу борада маҳаллалар бешлиги фаолиятининг таҳлилига бағишланган йиғилиш бўлиб ўтди.
Унда вилоят прокурорининг ўринбосари Дилмурод Умаралиев, вилоят ИИБ бошлиғининг биринчи ўринбосари Қаҳрамон Эргашев, туман ҳокими Асадулло Нажмиддинов ва сектор раҳбарлари иштирок этишди.
Йиғилишда туманда жиноятчилик ва ҳуқуқбузарликлар сони ўтган йилнинг олти ойига нисабатан ошиб кетганлиги, бунда айрим маҳаллалар "бешлиги"нинг етарли фаолият олиб бормаётгани, жиноятчиликнинг оқибати эмас, сабаблари билан курашилсагина натижага эришиш мумкинлиги таъкидланди.
Шу боис маҳаллаларда ўн тоифадаги шахслар билан ишлаш бўйича хатлов ўтказиб, профилактика инспектори хулосаси билан тегишлилигича "бешлик"ка бириктирилиши ва улар билан тизимли ишланиши белгиланди.
Йиғилиш якунида бир қатор намунали фаолият юритаётган профилактика инспекторлари рағбатлантирилди.