Сўнгги янгиликлар
Янгиликлар
Бугун эрта тонгдан Янгиқўрғон туманининг барча ҳудудларида ҳам кўтаринкилик ва ҳамжихатликда ободонлаштириш ва кўкаламзорлаштириш ҳашари ташкил этилди.
Бунда ҳашарчилар ўзлари яшаб турган маҳаллаларини, кўчаларини, аждодлари мангу қўним топган қабристонларни, зиёратгоҳларни ободонлаштиришга, саранжом-саришта ҳолатга келтиришга алоҳида эътибор қаратишмоқда.
Ҳашарда иштирок этаётган ташкилотчилар, маҳалла нуронийлари ва ёшлари ҳудудларни чиқиндилардан тозалаш, дарахтларга шакл бериш, оқлаш, ариқларни чопиш ишларида фаоллик кўрсатмоқдалар.
Ҳамжиҳатлик, ободлик ва яратувчанлик рамзи сифатида меҳр-оқибат муҳитини шакллантирадиган мазкур оммавий тадбирда ҳашарчилар учун дошқозонларда ўйма, ош каби таомлар тайёрланмоқда.
Янгиқўрғон тумани ҳокимлиги Ахборот хизмати
Давлатимиз Раҳбарининг “Ўзбекистон маҳаллалари уюшмаси фаолиятини йўлга қўйиш ва маҳаллаларда бошқарув тизимини такомиллаштиришга оид қўшимча чора-тадбирлар тўғрисида”ги ПҚ-402-сон Қарорига мувофиқ “Энг намунали маҳалла раиси” танловини ўтказиш белгиланган.
Танловнинг асосий мақсади туман (шаҳар)ларда маҳалла раисларининг илғор тажрибаларини оммалаштириш, тизим ходимларининг фаолият самарадорлигини ошириш ҳамда намунали маҳаллалар доирасини кенгайтириш, ўз фаолиятида сезиларли ютуқларга эришаётган маҳалла раислари фаолиятини рағбатлантириш ҳисобланади.
Ўтказилган танлов натижаларига кўра, ҳакамлар ҳайъати қарори билан 1-ўринни Янгиқўрғон тумани, “Қизилёзи” маҳалласи раиси Жаҳонгир Ёқубжонов, 2-ўринни Уйчи тумани, “Қаҳрамон” маҳалласи раиси Каримахон Юнусова, 3-ўринни Поп тумани, “Эски Тўда” маҳалласи раиси Раҳмонжон Юлдашев эгаллади.
Қариси бор уйнинг, фариштаси, файзи ва баракаси бўлади, деганлари ҳаётда ўз исботини топган.
Бугун, Халқаро хотин-қизлар айёми арафасида Янгиқўрғон туман ҳокимлигининг ташаббуси билан юз билан юзлашган пиру бадавлат онахонлар йўқланиб, байрам билан қутланди.
Жумладан, Поромон маҳалласидан Суюмхон Сотимова, ҳадикентлик Ачахон Тоғаева, Булоқбошидан Ҳамрохон Йўлдошевалар байрам билан қутланиб, уларга совға-саломлар улашишди.
Табаррук ёшдаги онахонлар дориломон кунларга, навбаҳорга етказганига шукроналар келтиришди ҳамда юртга тинчлик, элга омонлик сўраб дуога қўл очдилар.
Янгиқўрғон тумани ҳокимлиги Ахборот хизмати
Мамлакатимизда тадбиркорликни, айниқса кичик ва ўрта бизнесни ривожлантириш, фаолиятида келиб чиқаётган муаммо ва тўсиқларни бартараф этиш бўйича комплекс чоралар кўрилмоқда.
Бугун Янгиқўрғон тумани ҳокимлигида секторлар раҳбарлари ҳамда 170 нафар тадбиркорлар иштирокида мулоқот бўлиб ўтди.
Унда 22 нафар тадбиркорлардан ер ажратиш, фаолиятини кенгайтириш, кредит, бино-иншоот, инфратузилмани яхшилаш масалаларида мурожаатлар келиб тушди.
Мурожаатларнинг 5 таси жойида ҳал этилди. Қолганлари тегишлилиги бўйича соҳа раҳбарларига йўналтирилиб, назоратга олинди.
Мулоқотда, шунингдек тадбиркорлар томонидан ташаббуслар илгари сурилдики, булар тадбиркорлик ривожи ва туман равнақида муҳим аҳамият касб этади, шубҳасиз.
Маълумот учун бугун Янгиқўрғон туманида 1480 нафар тадбиркорлик субъектлари фаолият юритмоқда.
Янгиқўрғон тумани ҳокимлиги ахборот хизмати
Маълумки, минг йиллар давомида ҳар қайси жамиятнинг маданий даражаси ва маънавий баркамоллиги аёлларга бўлган муносабат билан белгиланган. Аёлни эъзозлаш, унга эҳтиром кўрсатиш ўзбек халқига хос хусусиятдир.
Бугунги кунда ўзбек аёлларининг нафақат оилада балки, мамлакат тараққиётида ҳам ҳиссаси катта. Хотин-қизларимиз мамлакат сиёсий, ижтимоий-иқтисодий ҳаёти, давлат ва жамият бошқаруви, илму фан, соғлиқни сақлаш, маданият, спорт каби соҳалар ривожида фаол иштирок этмоқда.
8 март - Халқаро хотин-қизлар байрамини барча қатори қишнинг изғиринию ёзнинг жазирамасида туманимизнинг саришталиги, покизалиги, ободлиги учун меҳнатларини аямаётган туман Ободонлаштириш бошқармаси ходималари ҳам кенг нишонлашмоқда.
Бугун туман ҳокимлигининг ташаббуси билан бошқарманинг 70 нафардан зиёд аёлларини байрам билан муборакбод этиб, байрам совғалари топширилди.
Янгиқўрғон тумани ҳокимлиги Ахборот хизмати